Anne Hathaway “ters” apo simbol fati? Tifozët e Arsenalit kapen pas një koincidence të pazakontë

Mes mijëra tifozëve të Arsenalit që festuan kualifikimin në finalen e Champions League ishte edhe aktorja e njohur hollivudiane Anne Hathaway.

Ylli amerikan, i lindur në Brooklyn, nuk e ka fshehur kurrë mbështetjen e saj për skuadrën londineze. Së fundmi, ajo tërhoqi vëmendjen edhe në tapetin e kuq të filmit The Devil Wears Prada 2, ku u shfaq me fanellën e Arsenalit të vendosur mbi supe.

Por pikërisht ky film ka krijuar edhe një lidhje të veçantë me tifozët e “Gunners”, falë një koincidence që po komentohet shumë në rrjetet sociale.

Arsenali luajti finalen e vetme të historisë në Champions League në vitin 2006, pikërisht në të njëjtin vit kur doli filmi i parë The Devil Wears Prada me protagoniste Anne Hathaway.

Tani, 20 vite më vonë, skuadra londineze rikthehet sërish në finalen e madhe europiane ndaj PSG ndërsa në kinema pritet të dalë vazhdimi i filmit ikonë, “The Devil Wears Prada 2”.

Kjo përputhje ka bërë që shumë tifozë të Arsenalit ta konsiderojnë Anne Hathaëay një simbol fati për klubin, ndërsa në rrjet nuk kanë munguar komentet dhe teoritë humoristike mbi “magjinë” që lidh aktoren me finalet historike të londinezëve.