Ardon Jashari përfundon në listën e dëshirave të Juventusit

Në planet e merkatos së Juventus për sezonet e ardhshme ka dalë në pah një emër surprizë nga Milani: Ardon Jashari. Sipas La Gazzetta dello Sport, drejtuesit bardhezi kanë nisur të lëvizin në prapaskenë për të përforcuar mesfushën, me synimin për t’i dhënë skuadrës më shumë cilësi teknike, karizëm dhe fleksibilitet taktik.

Ndërkohë që trajneri Luciano Spalletti është i përqendruar te ndeshja e radhës në kampionat, drejtuesit po punojnë për t’i vënë në dispozicion një skuadër më konkurruese. Ideja nuk është zëvendësimi i Manuel Locatelli, por pasurimi i repartit të mesfushës, sidomos në funksion të një sistemi 4-3-3 që kërkon një organizator loje cilësor.

Në këtë kontekst hyn në skenë Jashari, i cili u transferua te Milani për rreth 34 milionë euro, por është penalizuar nga një dëmtim në perone dhe hapësirat e kufizuara në fushë. Mesfushori zviceran është një profil që Juventusi e ndjek prej kohësh, që nga koha kur aktivizohej me Club Brugge. Aktivizimi i pakët te kuqezinjtë ka tërhequr vëmendjen e drejtuesve të Juventusit, të cilët po monitorojnë situatën në rast se lojtari vendos të kërkojë më shumë hapësira diku tjetër.

Jashari nuk është i vetmi objektiv për mesfushën. Në listën e dëshirave është edhe Pierre-Emile Højbjerg, një profil me eksperiencë që mund të japë stabilitet në repart. Ndërkohë, e ardhmja e disa lojtarëve aktualë mbetet e paqartë, përfshirë Teun Koopmeiners, i cili është në radarët e Galatasaray dhe disa klubeve angleze.