Barcelona mund të shkruajë histori të re në përballjet me Real Madrid në kampionatin spanjoll. Sipas raportimeve të mediave spanjolle, skuadra katalanase ka mundësinë të thellojë diferencën në 14 pikë ndaj rivalëve madrilenë, nëse arrin fitore në “El Clasico”-n e sotëm, kur deri në fund të sezonit do të mbeten vetëm edhe tri javë.
Supersfida është programuar të zhvillohet mbrëmjen e së dielës në stadiumin Spotify Camp Nou, në një duel që mund të ndikojë jo vetëm në garën për titull, por edhe në historinë e rivalitetit mes dy gjigantëve spanjollë.
Sipas gazetës sportive “Sport”, Barcelona synon të regjistrojë një nga diferencat më të mëdha të pikëve ndaj Real Madridit në historinë e La Ligës. Rekordi aktual i katalanasve daton nga sezoni 2018/2019, kur skuadra e drejtuar nga Ernesto Valverde fitoi kampionatin me 19 pikë më shumë se madrilenët.
Një tjetër diferencë e madhe u regjistrua edhe në sezonin 2017/2018, po nën drejtimin e Valverdes, kur Barcelona e mbylli kampionatin 17 pikë përpara Real Madridit.
Ndërkohë, sezoni 2012/2013 mbetet një nga më dominuesit për katalanasit. Nën drejtimin e Tito Vilanova, Barcelona grumbulloi 100 pikë, kundrejt 85 të Real Madridit të drejtuar nga José Mourinho.
Raporti thekson se Barcelona mund ta arrijë sërish kuotën e 100 pikëve këtë sezon, nëse fiton të gjitha ndeshjet e mbetura.
Megjithatë, rekordi absolut i diferencës më të madhe mes dy skuadrave në La Liga mbahet ende nga Real Madridi. Në sezonin 2002/2003, ekipi i drejtuar nga Vicente del Bosque e mbylli kampionatin me 22 pikë më shumë se Barcelona, e cila atë edicion përfundoi vetëm në vendin e gjashtë.
Për të vendosur një rekord të ri historik, Barcelona do të duhet të fitojë të gjitha ndeshjet e mbetura, ndërsa Real Madridi të humbasë pikë në javët e fundit të sezonit.