Mbrojtësi i kombëtares shqiptare, Berat Gjimshiti, ka shkruar një kapitull të ri në historinë e Atalantës, duke hyrë në elitën e lojtarëve me më shumë paraqitje me fanellën zikaltër.
Në ndeshjen e fundit të përfunduar 0-0 ndaj Genoas, Gjimshiti regjistroi paraqitjen e tij të 332-të, duke u ngjitur në vendin e katërt në renditjen e të gjithë kohërave për klubin nga Bergamo. Me këtë shifër, ai ka lënë pas ish-mesfushorin Valter Bonacina.
Historia e tij me Atalantën nisi në janar të vitit 2016, kur u transferua nga Zurich. Pak kush mund ta imagjinonte në atë kohë se mbrojtësi shqiptar do të shndërrohej në një nga shtyllat kryesore të skuadrës gjatë epokës së trajnerit Gian Piero Gasperini.
Në krye të kësaj renditjeje qëndron kapiteni aktual Marten de Roon me 442 ndeshje, i ndjekur nga Gianpaolo Bellini me 435 paraqitje. Podiumi plotësohet nga Mario Pašalić, i cili numëron 341 ndeshje, 69 gola dhe 47 asiste.
Me 332 paraqitje dhe një rol kyç në mbrojtjen e Atalantës ndër vite, Gjimshiti konfirmon statusin e tij si një nga figurat më të rëndësishme të klubit në dekadën e fundit.
