Berlusconi: E kam ditur që Milani ka probleme financiare, pa Champions 100 mln euro humbje

Silvio Berlusconi është rikthyer të flasë për Milanin i cili në këto momente nuk po kalon aspak një periudhë të mirë. Ish-presidenti i “djallit” njofton se nëse ekipi vijon me këtë ecuri do të ketë probleme të mëdha financiare.

“E kam ditur që ka disa probleme financiare. Më shqetëson shumë heshtja e z. Li. Nëse gjërat vijojnë të shkojnë kaq keq, është e vërtetë që në pranverë skuadrën mund ta marrë përsipër fondi ‘Elliot’, por problemet financiare nuk zhduken”, tha Berlusconi.

Ish presidenti i kuqezinjve thekson se nëse kuqezinjtë nuk do t’ia dalin të kualifikohen në Champions League, atëherë situata ekonomike do të jetë shumë alarmante.

“Nëse gjërat do të shkojnë keq dhe nuk do të kualifikohemi në Champions, atëherë e ardhmja do të jetë e zymtë. Edhe pse skuadrën mund ta marrë fondi ‘Elliot’, sërish bilancit do t’i shtohet një humbje prej më tepër se 100 milionë eurosh dhe kjo gropë do të kërkojë vite që të mbyllet”, tha Berlusconi.