Policia arreston Ergys Agasin në Durrës, SPAK e kërkon për dosjen e ”AKSHI-t”

I shumëkërkuari nga SPAK-u për dosjen e AKSHI-t, Ergys Agasi, është arrestuar këtë të mërkurë nga forcat e Policisë së Shtetit në Durrës, teksa po lëvizte me makinën e tij në zonën e Plepave, i shoqëruar nga Uljan Shpatarakun, ish-polici i shpallur në kërkim.

Agasi është pikasur fillimisht nga efektivët e Forcës Operacionale në Elbasan dhe më pas ndjekja ka vijuar nga Peqini, Rrogozhina dhe në Durrës, ku edhe është arrestuar në zonën e Plepave. Në operacionin për arrestimin e Agasit janë angazhuar edhe Drejtoria Vendore e Policisë Durrës dhe vetë SPAK (jo në terren, por përmes dhënies së orientimeve).

Agasi po sillet drejt Drejtorisë Vendore të Policisë Tiranë.

Shpataraku u shpall në kërkim në 6 gusht, pasi teksa ka qenë me pushime në një hotel në Dhërmi, dyshohet se ka kërcënuar me jetë kamarierin dhe administratorin, pasi nuk i kishte pëlqyer ushqimi. Stafi i hotelit ka bërë kallëzim pranë Komisariatit të Himarës ku blutë kanë shpallur në kërkim ish-zyrtarin e policisë. Në maj, Skënder Hita e përjashtoi Shpatarakun nga radhët e Policisë për mosparaqitje në detyrë. Ai mbante detyrën e asistentit në Departamentin e Teknologjisë së Informacionit në Policinë e Shtetit.

Agasi me biznesmenin Ermal Beqiraj dhe persona të tjerë janë nën hetim nga SPAK si pjesë e një grupi kriminal që manipulonte tenderët publikë. Biznesmenët Ergys Agasi dhe Ermal Beqiraj janë të akuzuar për grup të strukturuar kriminal dhe manipulim me tenderët e ASHKI-t. Ermal Beqiri u arrestua pak kohë më parë në Francë, teksa po udhëtonte me avionin e tij privat mbi një central bërthamor. Lidhur me këtë çështje GJKKO ka pezulluar nga detyra edhe zv/drejtorin e Policisë së Tiranës Erion Ismailaj.

Drejtoresha e AKSHI-t, Mirlinda Karçanaj u vendos nën masën e “arrestit shtëpisë”, ndërsa ish-zv.drejtoresha e AKSHI-t Hava Delibashi u la në ‘detyrim paraqitje’ për shkak të shtatzënisë. Agasi dhe Beqiraj, akuzohen gjithashtu se përmes heqjes së lirisë dhe shantazhit detyruan biznesmenin Gerond Meçe, të tërhiqej nga ankimimet për disa tenderë ku donin të dilnin fituese kompanitë e lidhura me ta.

Agasi lëvizte me automjet bashkë me ish-policin e shpallur në kërkim, u pikasën në Elbasan