Serie A dhuroi një tjetër javë dramatike në garën për zonën Champions, teksa Napoli u mposht 3-2 në shtëpi nga Bologna, duke humbur mundësinë për të siguruar matematikisht kualifikimin dy javë para fundit të kampionatit.
Skuadra mike nisi sfidën me ritëm të lartë dhe gjeti avantazhin që në minutën e 9-të. Federico Bernardeschi realizoi një supergol me të majtën, duke shtangur tifozët vendas. Bologna vazhdoi të sulmonte dhe ishte pranë golit të dytë me Juan Miranda, ndërsa Napoli hasi vështirësi për të reaguar.
Në minutën e 34-t, kapiteni Giovanni Di Lorenzo shkaktoi penallti ndaj Miranda-s dhe Riccardo Orsolini nuk gaboi nga pika e bardhë, duke dyfishuar shifrat për miqtë. Napoli reagoi vetëm në fundin e pjesës së parë, kur Di Lorenzo shënoi për 2-1 në minutën e 47-të.
Fillimi i pjesës së dytë solli menjëherë barazimin për vendasit. Pas asistit të Hojlund, Alisson Santos dërgoi topin në rrjetë në minutën e 48-të. Napoli mori zemër dhe iu afrua golit të tretë me Rrahmanin dhe Politano-n, por portieri Pessina bëri disa pritje vendimtare.
Kur pritej fundi i barabartë, Bologna goditi sërish. Rowe realizoi me roveshatë në minutën e 90-të, pas një grushtimi fillestar të Milinkovic-Savic, duke vulosur fitoren 3-2.
Me këtë sukses, Bologna ngjitet në vendin e tetë me 52 pikë, ndërsa Napoli mbetet i dyti me 70 pikë dhe tashmë ndjen presionin e rivalëve në garën për Champions League.