Buffon me deklaratë të çuditshme: Inter, më i mirë se Barcelona dhe Real Madrid

Gianluigi Buffon, portieri i Juventusit, pas takimit me Sasuolon ka lëshuar një deklaratë disi të çuditshme përsa i përket ndeshjes së ardhshme. Bardhezinjtë do të presin Interin në “Juventus Stadium” në takimin më të ndezur të Italisë, Derby d’Italia.

Buffon për Sky Sport: “Tani kemi ndeshjen kundër Inter, që momentalisht është më mirë se Real Madrid dhe Barcelona. Do të jetë një ndeshje e vështirë, kemi shumë respekt për ta. Inter është një ekip shumë i fortë, ata e treguan këtë edhe gjatë fazës së parë.”

Zikaltërit pas një nisje të dobët të kampionatit, javët e fundit kanë arritur të marrin 7-të fitore rradhazi duke u ngjitur në vendin e 4 me -9 pikë nga Juventus. Pavarësisht kësaj kjo duket si një “dredhi” e kapitenit Juventin, i cili kërkon të kalojë presionin në skuadrën kundërshtare, pasi siç po e tregon kampionati bardhezinjtë janë një kockë e fortë që nuk mund të kapërdihet nga askush.

Gjithsesi, një derbi asnjëherë nuk i dihet pasi për t’a fituar nuk mjafton vetëm cilësia.

Në ndeshjen e parë të luajtur mes këtyre skuadrave në “Guizeppe Meazza”, Interi doli fitues me rezultatin 2-1 duke fituar me përmbysje falë golave të Icardit dhe Perisiç.