“Buzëqesh” Pioli, Milani rikuperon 4 yje për sfidën ndaj United

Milani do të zbresë në fushë me objektivin për të eliminuar Manchester United dhe për të kapur fazën çerekfinale të Europa League dhe përpara këtij dueli kaq të rëndësishme trajneri Stefano Pioli ka marrë lajme të shumë të mira nga infermieria. Zlatan Ibrahimovic është stërvitur me grupin këtë të martë dhe do të jetë i gatshëm për sfidën ndaj ish-skuadrës së tij, por rikthimit Ibras nuk është lajmi i vetëm i mirë për trajnerin e kuqezinjëve pasi edhe dy qendërmbrojtësit Simon Kjaer dhe Alesio Romagnoli dhe mesfushori algjerian Ismael Bennacer do të jenë plotësisht të gatshëm për duelin e të enjtes.

Për momentin i vetmi lojtar me probleme në shtëpinë e Milanit është mbrojtësi anësor Davide Calabria i cili vazhdon të stërvitet i diferencuar dhe duhet të shtrëngojë dhëmbët për të qenë në fushë ndaj Manchester United, kështu që aktivizimi i tij vazhdon të mbetet në dyshim. Me shumë gjasa Stefano Pioli nuk do të rrezikojë në përballjen me Djajtë e Kuq as sulmuesin portugez Rafael Leao i cili mori një goditje në ndeshjen ndaj Napolit, por duke patur parasysh edhe skualifikimin prej 2 ndeshjesh të kroatit Ante Rebic nga gjykatësi sportiv i Serie A, trajneri i Milanit do ta ruajë Leaon për ndeshjet e kampionatit.