Cordeiro “hero” për Kukësin ndaj Laçit, Luftëtari fundos Kastriotin (VIDEO)

William Cordeiro nderon Kukësin në transfertën e vështirë ndaj Laçit në “Elbasan Arena”. Anësori 25-vjeçar shënoi golin e vetëm të takimit pasi një mori një asist perfekt nga Shafik në minutën e 60-të dhe me cilësitë e një numri 9 fals realizoi golin që i vlejti 3 pikë skuadrës verilindore.

Për herë të parë në këtë sezon Luftëtari del nga zona e ftohtë e renditjes. Skuadra gjirokastrite mori një fitore me shumë peshë 0-2 në transfertë me Kastriotin, një kundërshtar direkt për mbijetesën. Ekipi i drejtuar nga Gentian Mezani befasoi krutanët në fillim të  pjesës së dytë me golin e Vasil Shkurtajt, pas krosimit të Rolovicit nga e djathta e sulmit.

Në fakt, Kastrioti zhvilloi një pjesë të mirë në “Redi Maloku”, ku iu afrua golit me Mziun, por reagimi i Ruçit ishte për t’u vlerësuar. Skuadra e Stavri Nicës, që në këtë debutim të tij me Kastriotin nuk ishte në stol për arsye pezullimi, tentoi të kthente ndeshjen në pjesën e dytë, por nuk qe e aftë për të shkuar deri te goli, madje pësoi edhe të dytin në minutën e 83-të. Më këtë humbje duket se Kastrioti i minimizon shanset për mbijetesë, edhe pse deri në fund të sezonit ka shumë ndeshje për t’u zhvilluar.