“Del Piero, i vetmi që mund t’ia rikthejë identitetin Juventusit”

Kriza e Juventusit vijon të ndezë debat edhe mes ish-figurave historike të klubit bardhezi. Ish-mesfushori Alessio Tacchinardi, në një intervistë për “Tuttosport”, ka bërë thirrje që drejtuesi i grupit John Elkann të përfshijë Alessandro Del Piero në projektin e ri të Juventusit, duke e konsideruar figurë kyçe për rikthimin e identitetit të skuadrës.

Tacchinardi nuk e fshehu zhgënjimin për paraqitjet e fundit të ekipit, duke theksuar se Juventusi është dorëzuar pikërisht në fazën më vendimtare të sezonit.

“Pas ndeshjes me Veronën isha shumë i zhgënjyer. Kundër Lecce pashë pak reagim, pak gjallëri, por ndaj Fiorentinës nuk pashë asgjë. Juventusi u shemb pikërisht në momentin më të rëndësishëm”, u shpreh ai.

Ish-mesfushori bardhezi tha se e ka të vështirë të kuptojë rënien psikologjike të skuadrës, duke nënvizuar se përgatitja për ndeshje të tilla duhet të kishte prodhuar një reagim më të fortë nga lojtarët.

Në analizën e tij, Tacchinardi rikujtoi edhe deklaratat e ish-trajnerit Thiago Motta, i cili muaj më parë kishte folur për “turp” dhe kishte kërkuar falje publike pas rezultateve zhgënjyese: “Këto dinamika të Juventusit nuk janë transmetuar më. I vetmi që e bëri vërtet këtë ishte Antonio Conte”

Në fund, Tacchinardi veçoi figurën e Del Pieros si personin e vetëm që mund të ndikojë realisht në ndryshimin e atmosferës dhe mentalitetit në klub.

“Alex Del Piero është i vetmi që mund ta ndryshojë fatin e Juventusit. Nuk e di në çfarë roli, por vetëm prania dhe fjalët e tij me disa lojtarë do të sillnin ndryshim në sjellje. Ashtu si Paolo Maldini te Milani, ai do të sillte energji, entuziazëm dhe ndjenjë përkatësie”, përfundoi ish-mesfushori bardhezi.