Deschamps paralajmëron Belgjikën: Ne kemi ndalur Messin … (VIDEO)

Koha fluturon, teksa gjysmëfinalja e parë e Kupës së Botës në Rusi mes Francës dhe Belgjikës po afron. Trajneri i “Gjelave”, Didier Deschamps, nuk ka frikë nga “djajtë e Kuq”, të cilët eliminuan Brazilin. Strategu i njohur beson se skuadra e tij do të arrijë që të frenojë yjet e ekipit të Martinez, ashtu siç bëri në fazën e 1/8-ve ndaj Messit.

“Jemi përgatitur për çdo të papritur, pavarësisht se si rivalët tanë do të luajnë në këtë sfidë. Përgatitja është e njëjtë si për ndeshjet e tjera. Njësoj si kur mundëm Argjentinën dhe ndalëm Messin një javë më parë. Kante e bllokoi mjaft mirë argjentinasin, kjo është e vërteta dhe kur Leo luajti ndaj nesh, thuajse ishte inekzistent në fushë”, tha Deschamps për mediat.

Ndeshja e parë gjysmëfinale do të luhet në Shën Petërburg. “Belgjika nuk ka ardhur rastësisht deri këtu, është një skuadër e fortë dhe me shumë talente. Personalisht e respektoj shumë këtë ekip. Ndaj Brazilit bënë një ndeshje të madhe, me një plan loje specifik, duke përforcuar mesfushën dhe mbyllur hapësirat dhe brazilianët nuk arritën të depërtonin. Ka shumë gjasa që këtë gjë të bëjnë edhe ndaj nesh, por jam i bindur se do të jemi gati”, deklaroi trajneri i transalpinëve.