Dinamo me sytë nga finalja e Europa League, bën tifo për Freiburg

Një skenar interesant europian mund t’i buzëqeshë Dinamo City-it, e cila po ndjek me vëmendje zhvillimet që lidhen me fatin e Freiburg në arenën ndërkombëtare.

Skuadra gjermane e mbylli sezonin e Bundesligës në vendin e shtatë, duke plotësuar kushtin e parë të një skenari që mund t’i hapë rrugën Dinamos drejt turit të dytë kualifikues të Europa Conference League.

Megjithatë, sfida më e madhe mbetet ende përpara. Që ky skenar të kompletohet, Freiburg duhet të triumfojë në finalen e Europa League ndaj Aston Villa.

Në rast se skuadra gjermane arrin të fitojë trofeun europian, atëherë Dinamo do të përfitonte nga rishpërndarja e vendeve në kompeticionet e UEFA-s dhe do të siguronte automatikisht kalimin në turin e dytë kualifikues të Conference League.

Një zhvillim i tillë do të ishte një avantazh i rëndësishëm për klubin kryeqytetas, pasi do të shmangte një raund eliminator dhe do të fitonte më shumë kohë për përgatitjen e sezonit europian.

Nëse ky skenar realizohet, Dinamo do ta përsëriste për të dytin vit radhazi prezencën direkte në turin e dytë të Conference League, duke mbajtur gjallë ambiciet për një aventurë sa më të gjatë në Europë.