Cristiano Ronaldo Jr. mund të rikthejë familjen Ronaldo në futbollin europian. Megjithatë, këtë herë nuk bëhet fjalë për Cristiano Ronaldo, por për djalin e tij, i cili po spikat me ekipet zinxhir të Al Nassr.
Sipas raportimeve të “The Sun”, talenti i ri portugez ka tërhequr vëmendjen e disa prej klubeve më të mëdha të Europës falë paraqitjeve të tij në nivelet e moshave. Në garë për shërbimet e tij thuhet se janë klubet ku ka luajtur edhe vetë CR7, si Sporting, Manchester United, Real Madrid dhe Juventus.
Interes për 16-vjeçarin kanë shfaqur gjithashtu edhe PSG dhe Bayern Munich. Ndërkohë, në Itali përveç Juventusit, situatën po e monitorojnë edhe Inter dhe Atalanta.
Cristiano Ronaldo Jr., i lindur në vitin 2010, konsiderohet një nga talentet më premtues të brezit të tij dhe së fundmi fitoi edhe Kupën e Botës U-17 në muajin nëntor.
Megjithatë, sipas mediave britanike, familja Ronaldo nuk është plotësisht e bindur për një rikthim të menjëhershëm në Europë. Arsyeja kryesore lidhet me presionin e madh dhe krahasimet e vazhdueshme me të atin, që mund të ndikojnë negativisht në zhvillimin e tij si futbollist.
Për momentin, e ardhmja e Ronaldo Jr. mbetet e hapur, por interesimi i klubeve elitare europiane konfirmon se djali i CR7 po shihet si një talent me potencial të jashtëzakonshëm.