Duka rrëfen prapaskenat për Panuccin: Ja pse ishim për një italian

Presidenti i Federatës Shqiptare të Futbollit, Armand Duka ka komentuar zgjedhjen e bërë për të vendosur në stolin e Kombëtares italianin Christian Panucci, si zëvendës të De Biasit.

Në një intervistë në “Wake Up” në Top Channel, ai ka shpjeguar arsyet që çuan në zgjedhjen e një tjetër trajneri italian për Kombëtaren kuqezi.

“80% e mendimit teknik në Federatë, por jo vetëm, ka qenë e mendimit se duhet të kishim një trajner italian, pasi shkolla e tyre ka sjellë trajnerë të suksesshëm. Italianët janë më të disiplinuarit në botë për futbollin dhe disiplina është shumë e rëndësishme në këtë sport. Kjo është një nga gjërat kryesore që të merrnim trajner italian”, tha Duka.

I pyetur se pse pikërisht është zgjedhur Panucci, duke qenë se në rolin e trajnerit ka pak eksperiencë, Duka e ka vlerësuar atë, madje e ka krahasuar edhe me Zidane.

“Ne e kemi pasur ëndërr ta shohim në televizor dhe jo më “live”. Është një nga emrat më të mëdhenj ndër vite të futbollit italian. Duhet ta kemi për nder që e kemi këtu. Ka bërë shumë mirë atje ku ka trajnuar. Nuk besoj që ka më pak se Zidane”, është shprehur Duka.