FIFA përjashton nga lista dy arbitra të njohur shqiptarë

Lorenc Jemini dhe Andi Koçi nuk mbajnë më stemën e FIFA-s dhe me sa duket për ta karriera ndërkombëtare ka përfunduar. Dy gjyqtarët kryesorë, të pezulluar pa afat nga FSHF për shkak të gafave që kanë bërë në drejtimin e ndeshjeve të Kategorisë Superiore, tani janë zhdukur edhe nga lista e atyre që mund të drejtojnë aktivitete ndërkombëtare, duke lënë Shqipërinë me vetëm një gjyqtar.

Kjo lëvizje vjen nga vetë FSHF, e cila ka dënuar në këtë mënyrë të dy gjyqtarët shqiptarë për paraqitjet e dobëta. Jemini ishte prej shumë vitesh një gjyqtar ndërkombëtar me stemën e FIFA-s. Ndërsa Koçi mbijetoi vetëm pak muaj, pasi mori këtë stemë në fillimin e këtij viti, kur Bardhyl Pashaj u tërhoq nga arbitrimi për shkak të largimit nga Shqipëria.

Tani Shqipëria mbetet vetëm me një gjyqtar ndërkombëtar, Enea Jorgjin, por edhe ky i fundit është i “njollosur” nga paraqitjet e tij në këtë sezon. Edhe pse ai mban stemën e FIFA-s dhe cilësohet gjyqtar i Kategorisë së Dytë në arenën ndërkombëtare, emri i tij do të mbetet gjatë në listën e të padëshiruarve të shumë klubeve shqiptare pas bëmave në ndeshjen e titullit mes Kukësit dhe Skënderbeut./ panorama sport