Flick: Shpresoj që Yamal të mos ketë një dëmtim serioz

Trajneri i Barcelonës, Hansi Flick, komentoi fitoren minimale 1-0 ndaj Celta Vigo, duke theksuar vështirësitë që hasi skuadra e tij në këtë përballje.

“Janë ndeshje ku duhet të dish të vuash dhe e bëmë këtë. Në fund rëndësi kanë tre pikët”, u shpreh Flick, duke pranuar se katalanasit nuk zhvilluan një paraqitje të shkëlqyer.

Vëmendja kryesore mbetet te gjendja e Lamine Yamal, i cili u largua nga fusha pas golit të fitores nga pika e bardhë. “Duhet të presim analizat. Ndjeu diçka dhe shpresojmë të mos jetë serioze. Është për të ardhur keq për ne”, deklaroi trajneri gjerman. Ndërkohë, për João Cancelo ai u shpreh më optimist, duke lënë të kuptohet se problemi nuk është i rëndë.

Nuk munguan as polemikat për një gol të anuluar në fund të ndeshjes: “E pashë pamjen dhe është e vështirë të kuptohet vendimi i VAR-it, por duhet ta pranojmë dhe të vazhdojmë përpara pa justifikime”.

Në përfundim, Flick kërkoi fokus maksimal për sfidën e radhës ndaj Getafe, duke theksuar se skuadra ka mungesa të rëndësishme si Raphinha, Marc Bernal dhe Andreas Christensen, por pavarësisht kësaj, ekipi tregoi karakter në fushë.