Gega: Duhet të ngremë kokën pas humbjes me Skënderbeun

Trajneri i Partizanit, Skënder Gega në prag të ndeshjes së javës së 11-të, që do ta vendosë përballë Kamzës. Strategu i njohur ka folur për çështjen Trashi Skënderbeun, por edhe tifozët.

“Humbën fazën e parë në ndeshjen e parë në Korçë në minutën e 92-të dhe gjetëm forcat për të dalë në vend të parë. Gjithsesi jemi po aty, 1 pikë mbrapa. E dimë arsyen pse humbën. E kemi potencialin dhe forcën për t’u ringritur.

Është një humbje, perceptimet janë të ndryshme. Nuk e quaj dramë personalisht. Me çunat kam folur dhe u kam thënë se duhet të ngremë kokën. Humbëm një ndeshje me kundërshtarin që 2 herë e goditi portën. Minutën e 54-tën u bë gjuajta e parë e Skënderbeut. E kemi bagazhin dhe forcën për të treguar potencialin

Rikthimi i Trashit? E thashë edhe përpara ndeshjes. Trashi nuk është larguar por mori një masë disiplinore. Ka mënyrat e tij klubi. Unë e kam konsideruar si krahu i djathtë sepse është lider. Për mua është mbyllur çdo gjë. Stërvitet mirë dhe sillet mirë në stërvitje.

Ndeshjet pa tifozë? Jam munduar t’i ndjek lajmet dhe patjetër jam pjesë e klubit. Unë ndihem keq sepse është dënuar gjithë sportdashësi i Partizanit. E shoh të paarsyeshme të dënohen të gjithë. Është humbje e madhe për ne. Te Partizani ndihet kjo. Nuk mund të ndërhyj, por mund të them se institucionet tona janë inferiore karshi fqinjëve tanë. Ju e shikoni çfarë ndodh në stadiumet e Ballkanit, digjet flamuri jonë dhe nuk dënohet asnjë fushë”, deklaroi Gega.