Gjendet i pajetë një person në stadiumin e njohur në Gjermani

Një ngjarje e rëndë është raportuar në Veltins Arena, stadiumi i klubit Schalke 04 në Gjermani, ku një burrë 65-vjeçar është gjetur i pajetë në ambientet e tualeteve.

Trupi i viktimës u zbulua nga një punonjës pastrimi gjatë kontrolleve rutinë. Sipas raportimeve të mediave gjermane, përfshirë gazetën Bild, dyshohet se ai është banor i Gelsenkirchen, mund të ketë pësuar një problem të papritur shëndetësor të mërkurën e kaluar, ditë kur kishte marrë pjesë në një aktivitet të zhvilluar në stadium.

Megjithëse deri tani nuk ka prova që sugjerojnë një akt kriminal, autoritetet gjermane e konsiderojnë të pazakontë faktin që mungesa e tij nuk u vu re për më shumë se një ditë. Policia ka nisur hetimet për të sqaruar rrethanat e plota të ngjarjes dhe për të përcaktuar shkakun e saktë të vdekjes.

Ngjarja ka ngritur pikëpyetje mbi sigurinë dhe monitorimin në ambiente të tilla publike, veçanërisht gjatë aktiviteteve me pjesëmarrje të lartë.