Juventus synon Bernardo Silvën, Spalletti futet në “lojë” për ta bindur

Juventus ka vendosur në krye të listës së merkatos Bernardo Silva, me mesfushorin portugez që mund të transferohet në Torino si lojtar i lirë në sezonin e ardhshëm.

Sipas raportimeve të La Gazzetta dello Sport, një rol të rëndësishëm në këtë operacion mund të luajë trajneri Luciano Spalletti, i cili e ka kontaktuar tashmë lojtarin dhe i ka shprehur dëshirën për ta pasur nën drejtimin e tij.

Bernardo Silva konsiderohet një nga mesfushorët më cilësorë në Europë, me plot 19 trofe në karrierë, shumica e tyre të fituara me Manchester City nën drejtimin e Pep Guardiola. Megjithatë, 31-vjeçari dëshiron një sfidë të re, për të dëshmuar vlerat e tij edhe larg Anglisë.

Për të finalizuar marrëveshjen, kusht kyç mbetet kualifikimi i Juventusit në UEFA Champions League. Klubi bardhezi është i gatshëm t’i ofrojë një pagë deri në 7 milionë euro në sezon, plus bonuse.

Gjatë këtij sezoni, Silva ka zhvilluar 33 ndeshje në Premier League, si dhe paraqitje në FA Cup, EFL Cup dhe Champions League, duke realizuar 3 gola në total.