Kaos në derbin e Pragës, ndërpritet ndeshja pasi tifozët pushtojnë fushën (VIDEO)

Kaos dhe tension ekstrem në derbin e Pragës mes Slavia Prague dhe Sparta Prague, në një mbrëmje që duhej të ishte festë për vendasit, por u kthye në skena të turpshme dhune.

Takimi u ndërpre në minutat e fundit, teksa Slavia kryesonte 3-2 dhe ishte pranë festimit të titullit kampion. Situata doli jashtë kontrollit kur tifozët vendas ndezën flakadanë dhe zbritën nga tribuna pas porte, duke pushtuar fushën e lojës.

Pamjet e transmetuara nga stadiumi treguan momente paniku, me tifozë që sulmuan futbollistët e Spartës, por edhe përplasje direkte mes dy tifozerive. Në mes të kaosit, arbitri vendosi të ndërpresë ndeshjen dhe më pas ta mbyllë përfundimisht.

Raportohet se nga incidentet kanë mbetur të plagosur disa persona, mes tyre edhe portieri i Spartës, ndërsa forcat e sigurisë patën vështirësi për të rikthyer rendin në stadium.