Kaos te Reali/ Sherr në seancën stërvitore, pritet Mourinho dhe Salah në verë

Sezoni i Real Madrid po shkon drejt një fundi zhgënjyes, me skuadrën madrilene që rrezikon ta mbyllë vitin pa asnjë trofe dhe mes një klime të tensionuar brenda ekipit. Në kryeqytetin spanjoll, vëmendja vazhdon të jetë e përqendruar te Kylian Mbappé dhe reagimet e ashpra të tifozëve ndaj tij, por problemet në “Santiago Bernabeu” duket se janë shumë më të thella.

Sipas raportimeve të medias spanjolle Marca, gjatë një prej seancave të fundit stërvitore, Aurélien Tchouaméni dhe Federico Valverde janë përplasur ashpër mes tyre, me situatën që për pak degradoi edhe në konfrontim fizik.

Ky episod nuk konsiderohet i izoluar. Mediat spanjolle raportojnë se tensioni në dhomat e zhveshjes është rritur ndjeshëm javët e fundit. Vetëm pak ditë më parë, edhe Antonio Rüdiger ishte përfshirë në një incident me Carreras, duke reflektuar atmosferën e rënduar që po kalon skuadra.

Në këto kushte, drejtuesit e klubit besohet se kanë humbur besimin te stafi aktual teknik dhe po mendojnë seriozisht për ndryshime të mëdha në fund të sezonit. Emri i José Mourinho po fiton gjithnjë e më shumë terren në zyrat e presidentit Florentino Pérez. Portugezi shihet si profili ideal për të rikthyer disiplinën dhe stabilitetin në skuadër, veçanërisht në prag të një tjetër “El Clasico” vendimtar.

Në të njëjtën kohë, nga Egjipti vijnë lajme të bujshme për të ardhmen e Mohamed Salah. Sipas mediave lokale, “Faraoni” mund të jetë objektivi i madh i verës për Real Madridin. Salah ka njoftuar largimin nga Liverpool , por dëshira e tij mbetet të vazhdojë karrierën në nivelet më të larta të futbollit europian dhe të luftojë për trofe madhorë.