Kombëtarja: Andrea Pirlo kandidat kryesor, Guardiola mbetet ëndërr e vështirë

Andrea Pirlo po shfaqet si një kandidat surprizë, por serioz, për postin e trajnerit të ri të kombëtares. Kjo nuk do të ishte një befasi për Paolo Maldinin dhe Leonardon, të cilët janë ngarkuar me detyrën e përzgjedhjes së emrit të ardhshëm. Maldini e kishte dashur Pirlo në stolin e Milanit në verën e vitit 2023, ndërsa Leonardo e kishte kërkuar si lojtar në Paris gjatë sezonit 2011-2012.

Në moshën 47-vjeçare, Pirlo, megjithëse jo “shumë i ri”, konsiderohet një trajner i ri me përvojë, duke drejtuar më parë Juventusin, Karagumrukun turk dhe Sampdorian, ndërsa aktualisht stërvit në Dubai. Për drejtorin teknik Maldini dhe këshilltarin Leonardo, Pirlo mishëron cilësitë thelbësore për drejtuesin e kombëtares që synon të rigjejë suksesin deri në vitin 2030: njohuri të thella të futbollit italian, guxim, ide dhe shpirt.

Aktualisht, procesi është në fazën e bisedimeve dhe reflektimit, përpara hapit përfundimtar të emërimit. Në këtë periudhë, Pirlo zë një vend në rreshtin e parë të kandidatëve. Në sfond mbetet ëndrra për Pep Guardiolën, megjithëse konsiderohet një operacion kompleks për t’u realizuar. Gjithashtu, kandidaturat e Antonio Contes dhe Roberto Mancinit, të cilat kanë qenë në lojë prej kohësh, vazhdojnë të jenë prezente.

Deri në fund të javës, Maldini dhe Leonardo pritet të marrin një vendim paraprak, pas së cilës topi do t’i kalojë presidentit të FIGC-së, Giovanni Malagò, për fjalën e fundit dhe zyrtarizimin e trajnerit të ri.

Marrë nga La Gazzetta dello Sport