Polemikat pas gjysmëfinales së kthimit të Champions League mes Bayern Munich dhe Paris Saint-Germain kanë marrë përmasa të mëdha, ndërsa raportohet se UEFA ka nisur një proces verifikimi lidhur me arbitrimin e sfidës.
Sipas raportimeve të mediave ndërkombëtare, menjëherë pas përfundimit të ndeshjes, një zyrtar i lartë anonim i është drejtuar zyrës së presidentit të UEFA-s, Aleksander Ceferin, duke kërkuar shqyrtimin urgjent të disa episodeve të diskutueshme gjatë takimit.
Në qendër të debatit janë tre vendime të arbitrit portugez Joao Pinheiro, të cilat sipas raportimeve konsiderohen si të dëmshme për Bayern Munich.
Mediat kanë ngritur gjithashtu dyshime edhe për një kontakt të pretenduar mes arbitrit Pinheiro dhe presidentit të Paris Saint-Germain, Nasser Al-Khelaifi, përpara nisjes së sfidës në Munich.
Deri tani nuk ka një reagim zyrtar nga UEFA mbi pretendimet, ndërsa pritet që ditët e ardhshme të sjellin zhvillime të reja rreth çështjes që ka ndezur debat të madh në futbollin evropian.