Le të kalojmë menjëherë në thelb: A mund ta fitojë Maroku Kupën e Botës? Po flasim për vitin 2026, jo për vitin 2030, kur mundësitë për të pasur finalen në Kazablanka, dhe jo në Bernabeu, do të jenë më të mëdha. Le të fillojmë me arsyet pro, të cilat janë pothuajse po aq të vlefshme sa ato kundër. Katër vjet më parë, të udhëhequr nga Walid Regragui, Luanët e Atlasit në Katar kaluan Spanjën në 1/8-at dhe Portugalinë në çerekfinale, duke arritur në gjysmëfinalen e parë për kontinentin afrikan. Kjo gjysmëfinale u humb me nder kundër Francës, duke e shndërruar Marokun në surprizën e Kupës së Botës.
Që atëherë, kombëtarja e Afrikës së Veriut ka zhgënjyer në një Kupë të Afrikës, por ka arritur në finale në edicionin pasardhës, atë të janarit të luajtur në shtëpi dhe të përfunduar me finalen e famshme kundër Senegalit, e humbur në fushë dhe e fituar, për momentin, në tavolinë. Ndërkohë, Maroku ka fituar një bronz Olimpik, një ar në Kupën e Botës U-20, dhe dy vende të dyta në dy Kupat e fundit të Afrikës për femra, një dëshmi e rritjes së tyre marramendëse. Pesëmbëdhjetë vjet më parë, Maroku nisi projektin e formimit të lidhur me Akademinë “Mohamed VI”, duke u frymëzuar nga modeli francez i Clairefontaine. Kjo mbjellje ka dhënë fryte mbresëlënëse.
Pas Kupës së Afrikës, federata marokene ndryshoi trajner, duke befasuar vëzhguesit e huaj dhe duke gëzuar mediat e tifozët vendas, të cilët akuzonin Regraguin për mbrojtje të tepruar dhe mungesë taktike. Në vend të tij u thirr Mohamed Ouahbi, i lindur në Belgjikë, por i rritur si trajner në federatë dhe autori i suksesit me ekipin U-20. Ouahbi ka përmirësuar skuadrën e Regraguit. Dy “blerje” të reja thelbësore janë 18-vjeçari Ayyub Bouaddi, ish-kapiten i ekipit francez U-21, dhe qendërmbrojtësi Issa Diop, me baba senegalez dhe gjithashtu ish-lojtar i të rinjve të Francës. Për pjesën tjetër, struktura kryesore e ekipit është e njëjta: Bounou, Hakimi, Ounahi, El Ayanoui, Brahim dhe Saibari. Këta janë lojtarë të pjekur, të gatshëm dhe të fortë.
Skuadra është e bashkuar, beson në vete dhe padyshim që çerekfinalja me Francën, një përsëritje e gjysmëfinales së katër viteve më parë, sjell me vete gjithë retorikën e hakmarrjes, sociale para se të jetë sportive, e cila është një motivim i fortë për marokenët. Nëse Maroku mund Francën, bëhet, nëse jo favoriti, një kandidat i madh për sukses. Këtu mbyllet fronti i “po”-së, duke kaluar te “Les Bleus” sepse Mbappé dhe shokët e tij përfaqësojnë argumentin më të mirë për ata që mendojnë se Maroku nuk do ta fitojë Kupën e Botës.
Është pothuajse e qartë: kombëtarja e Deschamps vjen nga dy finale, një e fituar dhe një e humbur. Dhe deri më tani, përveç sherrit me Paraguain, kishte treguar futbollin më të mirë, performancat më spektakolare, të udhëhequr nga Katër Fantastikët: Dembélé, Olise, Mbappé dhe Barcola. Gola me shumicë, lojëra sensacionale, një ndjenjë superioriteti dërrmues. Sinqerisht, sot, edhe pas ndeshjes Francë-Paraguai dhe ndoshta pikërisht për shkak të rezistencës fizike dhe mendore të treguar nga skuadrës së Deschamps, Franca duket superiore ndaj Marokut. Prandaj, nëse duhet të japim një përgjigje të prerë, themi se Luanët e Atlasit do ta fitojnë Kupën e Botës në vitin 2030. Por ata kanë të gjitha kartat në rregull për të na përgënjeshtruar tashmë në dy javët e ardhshme.
Marrë nga La Gazzetta dello Sport