Luis Enrique ka vlerësuar maksimalisht paraqitjen e skuadrës së tij pas barazimit 1-1 ndaj Bayernit, rezultat që i siguroi Paris Saint-Germain kualifikimin në finalen e Champions League, ku do të përballet me Arsenal.
Pas ndeshjes, trajneri spanjoll theksoi karakterin dhe forcën mendore të treguar nga ekipi i tij në një duel me ritëm shumë të lartë dhe tension të madh.
“Karakteri që treguam kundër kësaj skuadre të madhe ishte i jashtëzakonshëm”, deklaroi Luis Enrique, duke nënvizuar se përballje të tilla kërkojnë jo vetëm cilësi teknike, por edhe personalitet dhe pjekuri.
Tekniku i PSG-së e cilësoi kalimin në finale si një tjetër dëshmi të rritjes së vazhdueshme të skuadrës franceze, e cila tashmë po shndërrohet në një nga ekipet më të konsoliduara të futbollit europian.
Luis Enrique shprehu kënaqësinë edhe për arritjen e finales së dytë radhazi në Champions League.
“Jemi shumë të lumtur që kemi arritur finalen e dytë radhazi në Champions League. Ishte një ndeshje shumë intensive dhe e vështirë. Ata luajnë futboll të një niveli shumë të lartë. Të dyja skuadrat janë të ngjashme, pasi edhe ne preferojmë presionin e lartë. Jemi shumë të kënaqur”, u shpreh ai.