Manchester City nderon Guardiolën, tribunë dhe statujë për trajnerin pas një dekade suksesi

Manchester City ka vendosur të nderojë në mënyrë të veçantë Pep Guardiolwn, i cili pritet t’i japë fund aventurës së tij dhjetëvjeçare në stolin e klubit anglez.

Klubi nga Mançesteri ka bërë të ditur se tribuna veriore e rinovuar dhe e zgjeruar e stadiumit “Etihad” do të mbajë emrin “Tribuna Pep Guardiola”, si një homazh për kontributin e jashtëzakonshëm të teknikut spanjoll në historinë moderne të klubit.

Përveç emërtimit të tribunës, Manchester City ka konfirmuar gjithashtu ndërtimin e një statuje në nder të Guardiolës, e cila do të vendoset përgjatë hyrjes që të çon drejt tribunës me emrin e tij.

Pronari i klubit, Mansour bin Zayed Al Nahyan, vlerësoi ndikimin e trajnerit katalanas jo vetëm për trofetë e fituar, por edhe për mënyrën se si ndryshoi identitetin sportiv të klubit.

“Ai ka lënë një gjurmë të pashlyeshme në ADN-në e klubit. Një trashëgimi që nuk lidhet vetëm me trofetë, por me mënyrën se si u arritën ato. Guardiola do të ketë gjithmonë mirënjohjen time dhe të gjithë familjes së City-t, pjesë e së cilës do të mbetet përgjithmonë”, është shprehur sheiku Mansour.

Tribuna e re pritet të inaugurohet plotësisht në ndeshjen e fundit të Guardiolës në krye të skuadrës, sfidë që do të zhvillohet të dielën ndaj Aston Villa-s, duke shënuar fundin e një epoke historike për Manchester City-n.