Maurizio Sarri shpërthen: Nuk paraqitemi nëse derbi ndaj Romës luhet të dielën!

Trajneri i Lazios, Maurizio Sarri, u shfaq tepër i zhgënjyer pas humbjes në finalen e Kupës së Italisë ndaj Interit. Tekniku italian, i cili ishte i pezulluar dhe nuk ndodhej në stol, pranoi se skuadra e tij ia bëri shumë të lehtë kundërshtarit triumfin.

“Bëmë gjithçka vetë, ua falëm dy gola. Pastaj nuk arritëm më as ta rihapnim ndeshjen. Ata janë më të fortë se ne, por sfida mund të kishte marrë tjetër rrjedhë”, deklaroi Sarri.

Por deklarata më e fortë e trajnerit lidhej me çështjen e derbit dhe kalendarit të kampionatit, ku Sarri sulmoi ashpër organizatorët: “Kam ndjesinë se nëse ne luajmë të hënën, ata luajnë të dielën në 12:30. Po të isha presidenti, nuk do ta paraqisja fare skuadrën në fushë. Për ne është njësoj, marrim një pikë penalizim dhe mbyllet aty.

Gabimet e mëdha i ka bërë Lega Serie A, që në Torino vendosi derbin gjatë ATP Finals dhe këtu derbin gjatë Internazionaleve të tenisit. Tani duhet të gjejnë zgjidhje, por prefekti ka qenë shumë i qartë. Askush nuk ka kërkuar falje për gabimin. Katër skuadra po luftojnë për një ndeshje që vlen 80 milionë euro dhe kjo nuk është më futboll.”