Mbappe: Trajneri më tha se jam sulmues i katërt, i pranoj kritikat e tifozëve

Mes tensioneve, kritikave dhe shumë pikëpyetjeve mbi të ardhmen e skuadrës, Real Madrid u rikthye te fitorja duke mposhtur 2-0 Real Oviedo në “Santiago Bernabeu”. Megjithatë, më shumë sesa rezultati, vëmendjen e mori vendimi i trajnerit Alvaro Arbeloa për të lënë në stol dy nga yjet kryesorë të ekipit, Kylian Mbappe dhe Jude Bellingham.

Pavarësisht suksesit, atmosfera në “Bernabeu” mbeti e tensionuar. Tifozët nuk kursyen vërshëllimat për skuadrën, ndërsa objektivi kryesor ishte Mbappe.

Sulmuesi francez, pas ndeshjes, zbuloi me ironi një bisedë me trajnerin Arbeloa: “Trajneri më tha se për të jam sulmuesi i katërt në grup. Unë isha gati të luaja që nga minuta e parë, por vendimi i takon trajnerit. Duhet ta respektoj dhe të punoj më shumë që të jem më i mirë se Vinicius, Mastantuono dhe Gonzalo.”

Më tej, ylli francez u shpreh se i kupton reagimet e tifozëve, duke theksuar se kjo është diçka që ndodh shpesh në Madrid me lojtarët më të mëdhenj.

Në fund, Mbappe bëri edhe një analizë të sezonit të skuadrës: “E nisëm mirë, por më pas humbëm identitetin dhe stilin e lojës. Të mbyllësh sezonin pa trofe të bën të ndihesh keq. Duhet të pranojmë kritikat dhe të nisim gjithçka nga e para me më shumë ambicie.”