Cristiano Ronaldo ishte sërish protagonist, këtë herë jo vetëm për paraqitjen në fushë, por edhe për një episod tensioni me tifozët gjatë fitores 4-2 të Al Nassr ndaj Al Shabab.
Gjatë ndeshjes, nga tribunat nisën thirrjet provokuese “Messi, Messi, Messi”, të drejtuara ndaj yllit portugez. Reagimi i Ronaldos nuk mungoi. Fillimisht i irrituar, 41-vjeçari u kthye nga tifozët dhe më pas ironizoi situatën duke bërë dirigjentin e koreve, ndërsa shoqëroi gjithçka edhe me një gjest sarkastik me gishtin e madh.
Situata krijoi tension për disa çaste, aq sa edhe disa lojtarë kundërshtarë ndërhynë për ta qetësuar dhe rikthyer fokusin te loja. Megjithatë, episodi nuk ndikoi në paraqitjen e Al Nassr, që mori një fitore të rëndësishme në garën për titullin në kampionatin saudit.
Skuadra e drejtuar nga Jorge Jesus tashmë afrohet edhe më shumë me kreun dhe përgatitet për supersfidën ndaj Al Hilal në javën e ardhshme.
Nga ana tjetër, Ronaldo vazhdon të konfirmojë formën e tij të shkëlqyer. Legjenda portugeze ka realizuar 26 gola këtë sezon dhe ka shkuar në kuotën e 971 golave në karrierë.
Cristiano Ronaldo is such a vibe🤣🤣🤣💛
— The Nassr Tribune™️ (@AlNassrTribune) May 7, 2026