“Mister, ekip i fikur”/ Gazetari “ngacmon” Rejan, italiani i përgjigjet me batutë

Komentatori i njohur, Dritan Shkakohoxha nuk e ka pritur mirë barazimin 0-0 përballë Kazakistanit, duke e etiketuar kombëtaren kuqezi si një “ekip i fikur”.

Dhe këtë konstatim Shakohoxha ia tha përballë teknikut italian të Kombëtares Edi Reja.

“Mister, kjo skuadër është e fikur. Po dëgjoj që thuhet edhe nga lojtarët që luajtëm shumë mirë, por ndoshta kemi parë ndeshje tjetër ne këtej nga studio… Çfarë nuk shkon me skuadrën, sepse nuk ka “zjarrin” që e karakterizon përherë?”, ishte pyetja e gazetarit për teknikun e Kombëtares.

Reja nga ana tjetër është përgjigjur me një batutë, duke thënë: “Grinta dhe “zjarri” që ne kërkojmë të gjithë nuk mund të blihet në farmaci”.

Shakohoxha replikoi sërish duke thënë se në farmacia mund të blejë çdokush shumë gjëra, por grinta injektohet dhe përgjegjësia në këtë rast është edhe e trajnerit.

Kombëtarja barazoi pa gola në transfertën e sotme në Kazakistan dhe pas 3 ndeshjesh të zhvilluara numëron 4 pikë.