Moggi bën deklaratën e fortë: Allegri dhe Ibrahimovic janë zënë, nuk flasin me njëri-tjetrin!

Kriza te Milani vazhdon të thellohet dhe së fundmi kanë dalë në pah edhe tensione të forta brenda klubit kuqezi. Ish-drejtori legjendar i Juventusit, Luciano Moggi, ka bërë deklarata të forta për situatën në “San Siro”, duke zbuluar përçarje mes trajnerit Massimiliano Allegri dhe Zlatan Ibrahimović.

Në një intervistë për median italiane Libero, Moggi kritikoi drejtimin aktual të klubit dhe veçanërisht administratorin Giorgio Furlani, të cilin e konsideron përgjegjës për shumë nga problemet e Milanit.

“Sot në bankën e të akuzuarve është Furlani, i cili ka gabuar shumë që prej momentit kur mori drejtimin te Milani. Gjithçka nisi me largimin e Maldinit dhe tani e njëjta gjë mund t’i ndodhë edhe Tares”, deklaroi Moggi.

Sipas tij, një nga problemet më të mëdha në klub është fakti që shumë persona ndërhyjnë në çështjet sportive dhe në merkato, duke krijuar tensione edhe në dhomat e zhveshjes.

Moggi shtoi se ka njerëz pranë skuadrës që kritikojnë trajnerin dhe komunikojnë me lojtarët për të justifikuar paraqitjet negative, duke fajësuar mënyrën se si Allegri i pozicionon në fushë.

“Kjo është mënyra më e shpejtë për të shkatërruar një skuadër, duke vendosur lojtarët kundër trajnerit dhe njëri-tjetrit”, u shpreh ai.

Deklarata më e fortë lidhej me raportin mes Allegrit dhe Ibrahimovicit. Sipas Moggit, marrëdhënia mes tyre është prishur plotësisht.

“Te Milani ekziston një lloj paqeje e armatosur, ku të gjithë flasin pas shpine dhe askush nuk thotë hapur atë që mendon. Përjashtim bëjnë Allegri dhe Ibrahimovic, të cilët janë zënë dhe nuk flasin më me njëri-tjetrin”, zbuloi Moggi.