Napoli bën gati rinovimin me Hysajn, rritet ndjeshëm rroga e mbrojtësit shkodran

Napoli nuk kërkon që të befasohet nga klubet e mëdha europiane, teksa po përgatit rinovimet me disa prej yjeve të skuadrës. Puna e mirë e bërë nga Ancelotti në fillimin e këtij sezoni, kanë bërë të spikasin disa prej tyre edhe në arenën ndërkombëtare. Në mesin e futbollistëve që pritet të rinovojnë kontratën është edhe Elseid Hysaj.

Mediat italiane shkruajnë se kanë nisur kontaktet me agjentin e tij Mario Giuffredi me drejtorin sportiv, Cristiano Giuntoli. Objektivi është që shqiptari të përfitojë më shumë se 1.8 milionë euro që ka në kontratën aktuale, të vlefshme deri në vitin 2021. Kërkesa e tij është 3 milionë euro në sezon, por gjithçka mund të mbyllet në shifrën e 2,5 milionë eurove.

Një tjetër kërkesë e mbrojtësit të kombëtares sonë është që të hiqet klauzola me vlerë 50 milionë euro për klubet jashtë Italisë, por Napoli po heziton. /Koha Jone/