Neymar kalon Ronaldo “fenomenin”, tani synon rekordin e Pele

Me tre golat e shënuar përballë Perusë, Neymar ngjitet në vendin e dytë të renditjes historike për golashënuesit e përfaqësueses së Brazilit. Kapiteni i “Selecao” kaloi në vendin e dytë, një legjendë si Ronaldo “fenomeni”.

Neymar numëron 64 gola të realizuar në 103 ndeshje me Brazilin, ndërsa Ronaldo kishte shënuar 62 herë në 98 ndeshje. Vetëm Pele ka shënuar më tepër se 28-vjeçari. Diferenca nuk është e madhe, sepse me 77 gola me “seleçao”-n, “O’Rei” është vetëm 13 rrjeta larg.

Ndaj Perusë, sulmuesi i Paris Saint Germain realizoi tre gola, dy nga të cilët me 11-metërsh. Vetëm pak ditë më parë, Neymar u kthye të luante me përfaqësuesen e Brazilit pas 11 muajve mungesë, ku dha dy asist në fitoren me goleadë 5-0 ndaj Bolivisë.