Neymar reagon për herë të parë pas eliminimit: Momenti më i trishtueshëm në karrierë!

Brazili u eliminua në Kupën e Botës pas humbjes 1-2 ndaj Belgjikës, duke i dhënë fund ëndrrës për të fituar turneun në Rusi. Një nga protagonistët kryesor, nga i cili pritej shumë gjatë kësaj vere, ishte Neymar. Ylli i PSG nuk mundi që të spikaste deri më tani, ndërkohë që ka postuar sot një mesazh në profilin e tij në “Instagram”.

“Mund të them se ky është momenti më i trishtueshëm i karrierës time. Dhimbja pas eliminimit është shumë e madhe, pasi ne e dimë se i kishim të gjitha mundësitë për t’u kualifikuar dhe për të shkuar më tej, për të bërë historinë. Por nuk ishte dita jonë. Është e vështirë të gjesh forcën për të luajtur sërish futboll, por e di që Zoti do të më ndihmojë të jem sërish i fortë për t’u përballur sërish me këdo.

Dua të falënderoj Zotin edhe pse u mundëm, pasi e di që rruga jote është shumë herë më e mirë se e imja. Jam i lumtur që isha pjesë e kombëtares së Brazilit, jam krenar për gjithçka bëmë në Botëror. E lamë në mes ëndrrën tonë, por ajo ëndërr nuk është shuar as nga mendja dhe as nga zemra jonë”, tha Neymar.