Përdori celularin në timon, Beckhamit i hiqet për 6 muaj patenta

David Beckham është dënuar me 6 muaj heqje patente, sepse shkeli kësisoj rregullat e qarkullimit rrugor. 44-vjeçari, pranoi fajësinë për drejtim automjeti teksa përdorte telefonin në rrugët e qendrës së Londrës, që prej 21 nëntorit. Por, vetëm këtë të enjte, një gjykatë britanike shqyrtoi provat e fotografimit të tij prej një qytetari të rastit, duke përdorur telefonin celular teksa lëvizte “shumë ngadalë” për shkak të trafikut të rënduar.

Për këtë shkelje, Beckhamit iu hoqën 6 pikë në lejen e drejtimit, e po kaq është ndëshkuar edhe më herët për shkak të lëvizjes me shpejtësi mbi normat e lejuara. Jo vetëm kaq, pasi ai është gjobitur me 750 paund, është detyruar të paguajë 100 paund shpenzime hetimore, e më tej edhe një kamatëvonesë prej 75 paundësh, që të gjitha këto brenda 7 ditësh.

Në shtator, Beckham u akuzua se “i kishte ikur përgjegjësisë” si një shembull për të tjerët, kur iu shmang një hetimi për tejkalim shpejtësie, për shkaqe teknikalitetesh. Por, babai i 4 fëmijëve pranoi edhe asokohe se kishte ecur me shpejtësi 95 km/h në një zonë ku nuk lejohej më shumë sesa 64 km/h, në janar të vitit të kaluar në perëndim të Londrës.