Napoli nuk ka arritur të marrë më shumë se një pikë në javën e dhjetë të Serie A, duke barazuar 0-0 ndaj Comos në stadiumin “Diego Armando Maradona”.
Miqtë ishin shumë pranë golit në pjesën e parë, kur Morata u rrëzua në zonë nga Milinković-Savić, pas një depërtimi në kufijtë e pozicionit jashtë loje. Vetë sulmuesi spanjoll mori përsipër ekzekutimin e penalltisë, por gjuajtja e tij u ndal nga portieri serb, i cili regjistroi penalltinë e dytë të pritur radhazi në Serie A, pas asaj ndaj Camardas në sfidën Lecce–Napoli.
Në pjesën e dytë, Napoli u hodh në sulm, por tentativat e McTominay me kokë dhe goditjet e Politano-s u ndalën nga një Butez në formë të shkëlqyer.
Me këtë barazim, skuadra napolitane ngjitet në 22 pikë dhe mban përkohësisht vendin e parë, në pritje të rezultatit të Romës, që mund ta rrëzojë nga kryesimi.