Presidenti i PSG: Fantastike të shkosh sërish në finale, duam yllin e dytë!

PSG është rikthyer në finalen e UEFA Champions League, ndërsa presidenti i klubit, Nasser Al-Khelaïfi, nuk e fshehu entuziazmin pas triumfit ndaj Bayernit në gjysmëfinale.

“Është fantastike të jemi sërish në finale. Duam të fitojmë yllin e dytë”, deklaroi kreu i klubit parizien menjëherë pas ndeshjes, duke theksuar ambicien e madhe të kampionëve francezë për të vazhduar dominimin në futbollin europian.

Al-Khelaïfi zbuloi gjithashtu se kishte folur me futbollistët pas kualifikimit, duke i cilësuar ata si “luftëtarë të vërtetë” dhe një skuadër të fortë mendërisht. “Kemi ardhur këtu për të fituar”, shtoi ai.

Presidenti i PSG-së rezervoi edhe fjalë vlerësimi për kundërshtarin gjerman, duke pranuar nivelin e lartë të bavarezëve: “Kemi respekt të jashtëzakonshëm për Bayernin dhe për lojtarët e tij të mëdhenj”.

Ai kujtoi gjithashtu një nga momentet më historike të klubit, duke iu referuar finales së sezonit të kaluar, ku PSG triumfoi me rezultat të thellë 5-0 ndaj Interit.

Pavarësisht përpjekjeve të vazhdueshme të Bayern Munich për të rikthyer sfidën deri në minutat e fundit, skuadra e drejtuar nga Luis Enrique tregoi edhe një herë pjekuri, organizim dhe qetësi në momentet vendimtare, duke siguruar një tjetër finale historike për klubin francez.