Real gati të zgjerojë stadiumin “Santiago Bernabeo” me vlerë 600 milionë dollarë

Pas ndryshimit në stol, presidenti i Realit të Madridit, Florentino Perez ka një tjetër ëndërr. Të zgjerojë mitikun “Santiago Bernabeu” dhe ta bëjë  klubin më të mirë të shekullit të 21-të.  Sipas asaj që shkruajnë mediat spanjolle, Perez i ka premtuar fansave dhe qytetit të Madridit një rikonstruksion themelor në stadium, ndërkohë që përllogaritet se mitiku i ri do të sjellë të paktën 170 milion dollarë në sezon fitime.

“Santiago Bernabeu” i ri pritet t’i kushtojë plot 600 milionë dollarë arkave të klubit. Projekti është ndër më modernët. Ai pritet të mbulohet. Një fasadë titani do të mbyllë të gjithë pjesën e jashtme, e programuar për të ndezur dhe për të projektuar imazhe të momenteve nga historia e shkëlqyeshme e Realit.

Volkwin Marg, kreu i firmës gjermane arkitektonike Gerkan, Marg dhe Partners që projektuan arenën e re, i kishte thënë më parë CNN:

“Ne ishim të frymëzuar nga katedralet mesjetare, me të gjitha skulpturat dhe pikturat e tyre rreth ndërtesës duke  zbuluar pak nga historiku i tyre”. Qendra tregtare ekzistuese, dyqani dhe muzeu i klubit do të zgjerohen dhe një rrugë këmbësorësh prej 215,250 metra katrorë do të krijohet përgjatë anës perëndimore të stadiumit.