Revolucion te Juventusi në verë, nga Zhegrova te Vlahovic të gjithë drejt largimit

Ndeshja ndaj Fiorentinës mund të jetë e fundit në “Allianz Stadium” për disa lojtarë të Juventusit. Edhe pse Luciano Spalletti ka bërë të ditur se një pjesë e mirë e grupit aktual do të vazhdojë në Torino, drejtuesit bardhezi kanë nisur tashmë planin për një revolucion të thellë në skuadër.

Reparti që pritet të pësojë më shumë ndryshime është sulmi. Situata e Dusan Vlahovic mbetet ende e paqartë, ndërsa disa emra të tjerë konsiderohen pothuajse të larguar.

Lois Openda ka përfunduar jashtë projektit teknik dhe Juventusi po mendon ta huazojë për të shmangur humbje financiare, duke qenë se klubi investoi rreth 44 milionë euro për ta transferuar verën e kaluar. Në dalje është edhe Arkadiusz Milik, i penalizuar vazhdimisht nga problemet fizike.

Ndërkohë, edhe Jonathan David mund të largohet pas vetëm një sezoni. Sulmuesi kanadez nuk ka arritur të përshtatet plotësisht me presionin dhe pritshmëritë te Juventusi, ndërsa një shitje përfundimtare nuk përjashtohet.

Lista e largimeve nuk ndalet vetëm te sulmi. Filip Kostic pritet të largohet në fund të kontratës, ndërsa Juan Cabal nuk ka bindur trajnerin Spalletti dhe klubi po kërkon një sistemim të ri për të.

Në Torino ekziston edhe një grup lojtarësh me të ardhme të pasigurt. Edon Zhegrova kërkon më shumë hapësira, por kosovari nuk ka bindur plotësisht stafin teknik, sidomos për angazhimin në fazën mbrojtëse. Edhe Fabio Miretti rrezikon të mbetet një alternativë e përhershme nga stoli, situatë që mund ta shtyjë të kërkojë një aventurë tjetër për të luajtur më shumë.

Juventusi vazhdon të besojë te talenti i Vasilije Adžić, por drejtuesit mendojnë se zhvillimi i tij do të ishte më i mirë përmes një huazimi në një skuadër ku mund të aktivizohet rregullisht.

Megjithatë, largimet e planifikuara nuk pritet të sjellin të ardhura të mëdha financiare për klubin. Për këtë arsye, kualifikimi në Champions League konsiderohet jetik për projektin bardhezi. Në rast dështimi, drejtuesit e Juventusit mund të detyrohen të sakrifikojnë edhe ndonjë prej yjeve kryesorë të skuadrës për të balancuar financat.