Luis Enrique po merr sërish vlerësime maksimale nga opinioni sportiv europian pas kualifikimit të PSG në finalen e UEFA Champions League, pas barazimit 1-1 ndaj Bayernit në “Allianz Arena” dhe triumfit 6-5 në total.
Pas suksesit historik të sezonit të kaluar, ku PSG fitoi për herë të parë Champions League, tekniku spanjoll konsiderohet tashmë një nga trajnerët më të mirë në botë. Por ajo që ka bërë më shumë bujë pas ndeshjes së kthimit ndaj Bayern-it është një lëvizje taktike e pazakontë, që fillimisht u duk si gabim.
Portieri i PSG-së, Matvey Safonov, gjatë gjithë ndeshjes dërgonte topin jashtë vijës anësore nga goditjet e portës. Statistikisht, ai kompletoi vetëm 7 nga 33 pasime, duke krijuar përshtypjen e një paraqitjeje të dobët në shpërndarjen e topit.
Megjithatë, sipas analizave taktike, gjithçka ishte e planifikuar nga Luis Enrique. Duke e dërguar topin vazhdimisht në krahun e majtë të PSG-së dhe të djathtin e Bayern-it, skuadra franceze detyronte lojtarët të grumbulloheshin në një zonë të ngushtë të fushës. Kjo strategji kishte si objektiv neutralizimin e një prej armëve më të rrezikshme të bavarezëve, Michael Olise.
Sa herë që Bayern fitonte rivënie anësore, mbrojtësit e PSG-së e rrethonin menjëherë Olise, duke i hequr hapësirat dhe duke e detyruar të kthehej pas, larg zonave ku mund të ishte vendimtar. Ish-lojtari i Crystal Palace pati një mbrëmje shumë të vështirë dhe nuk arriti të ndikonte në lojë.
Në të njëjtën kohë, kjo skemë krijonte mundësi ideale për kundërsulme të shpejta, me Khvicha Kvaratskhelia që shfrytëzonte hapësirat në krah. Pikërisht gjeorgjiani dha asistin për golin vendimtar të Ousmane Dembele pas vetëm tre minutash lojë.
Në rrjetet sociale, tifozët e futbollit e quajtën Enrique-n “gjeni” dhe “mjeshtër taktik”, ndërsa shumë analistë e konsideruan këtë një tjetër provë të nivelit të jashtëzakonshëm të trajnerit spanjoll.
