Skandal në futbollin kinez: 13 klube dënohen për trukime ndeshjesh

Trembëdhjetë klube futbolli në Kinë janë ndëshkuar pas një hetimi të gjerë për trukime ndeshjesh, baste dhe korrupsion në industrinë e futbollit. Nëntë skuadra do ta nisin sezonin e ardhshëm të Superligës Kineze me pikë negative. Sanksionet më të rënda i morën Shanghai Shenhua, nënkampionët e sezonit të kaluar, dhe Tianjin Tigers, të cilave iu zbritën nga 10 pikë secilës. Katër nga skuadrat e ndëshkuara tashmë kanë rënë në Ligën e Parë Kineze.

Të 13 ekipet janë gjobitur gjithashtu me shuma që variojnë nga 21,000 deri në 104,000 paund (200,000 deri në një milion juanë). Këto dënime u dhanë nga autoritetet si rezultat i hetimit për manipulimin e ndeshjeve dhe bastet e lidhura me futbollin.

Një deklaratë theksoi se qëllimi i këtyre masave ishte “të ruhej disiplina e industrisë, të pastrohej mjedisi i futbollit dhe të mbahej një konkurrencë e ndershme”. Federata Kineze e Futbollit (CFA) shtoi se zbritjet e pikëve dhe gjobat financiare bazohen në shkallën, natyrën, seriozitetin dhe ndikimin social të transaksioneve të parregullta, duke theksuar politikën e saj të “tolerancës zero” ndaj korrupsionit.

Në shtator 2024, 43 zyrtarë dhe lojtarë u dënuan me ndalim të përjetshëm nga futbolli. Ish-mesfushori i Evertonit, Li Tie, së bashku me 73 persona të tjerë, janë gjithashtu të ndaluar përjetësisht. 48-vjeçari u burgos vitin e kaluar pasi pranoi se kishte trukuar ndeshje, kishte pranuar ryshfete dhe kishte ofruar ryshfete për të marrë një pozicion të lartë si trajner.