“Spanja rrezikon përjashtimin nga Botërori”, Ish-presidenti frikëson të gjithë

Ish-presidenti Vijar ka konfirmuar se situata është e rëndë pasi Spanja rrezikon shumë që të përjashtohet nga FIFA dhe Botërori “Rusi 2018”.

Në një intervistë për mediat spanjolle ai i bën apel politikës të heqë dorë, por thumbon edhe kryeministrin Rahoj.

“Mua më kanë pezulluar në mënyrë jo korrekte. Duhet të isha ende president i federatës spanjolle. Komisioni i Lartë i Sportit duhet të heqë dorë nga përfshirja në federatë, sepse do ta rëndojë situatën. Ajo tashmë është shumë e rëndë dhe FIFA e ka për detyrë që të na thotë të respektojmë statutin.

Unë dua që Spanja të shkojë në Botëror, por nëse nuk shkojmë, atëherë fajtorët e vetëm gjenden në qeverinë spanjolle. Nuk jam unë fajtori për këtë situatë dhe pjesëmarrja e Spanjës në Botëror nuk varet nga unë. Madje dua të them që FIFA-s nuk ia kam kërkuar unë reagimin për federatën spanjolle”.

“Ai është kryeministër i vendit dhe di shumë gjëra, por tani po flet edhe për futboll. Ndoshta do ta emëroj si ndihmës të Lopeteguit dhe, në këtë mënyrë, të fitojë para më shumë”.