SUPERLIGA/ FSHF në javë e fundit la jashtë të gjithë arbitrat me stemën e FIFA-s

Java e 20-të e Kategorisë Superiore do të mbahet mend gjatë nga sektori i gjykimit në futbollin shqiptar. Në pesë ndeshjet e kësaj jave, sektori i gjykimit nuk ka nxjerrë në fushë asnjë nga arbitrat kryesorë dhe asistentët që mbajnë stemën e FIFA-s.

Kryesorët Enea Jorgji, Eldorian Hamiti dhe Juxhin Xhaja nuk gjykuan në asnjë kategori këtë javë, madje ky i fundit mungon që prej dhjetorit pas ndeshjes Kukësi-Teuta 4-0, ku akordoi tri penallti në favor të verilindorëve.

Sikur të mos mjaftonte anashkalimi i kryesorëve, kjo javë konfirmoi se asnjë nga gjashtë asistentët ndërkombëtarë nuk ishte i angazhuar dhe pikërisht Denis Rexha, Rejdi Avdo, Ridigert Çokaj, Ilir Tartaraj, Nertil Bregasi dhe Dojando Myftaraj.