Tirana s’di të fitojë më në Superiore, “ngec” edhe ndaj Kamzës (VIDEO)

Tirana vazhdon ecurinë aspak të mirë në Kategorinë Superiore. Bardheblutë nuk kanë shkuar më shumë se një barazim 1-1 në duelin ndaj Kamzës, të vlefshëm për javën e 10-të.

Skuadra e Memës krijoi më shumë mundësi në 45 minutat e para, por portieri Avdyli ishte në formë të shkëlqyer. Në pjesën e dytë, bardheblutë arrijnë që të zhbllokojnë rezultatin në minutën e 64-t, me Sentamun, i cili goditi mjaft mirë me të majtën në zonë, duke mos i dhënë shanse reagimi portierit vendas.

Reagimi i Kamzës është i menjëhershëm. 5 minuta më pas Plaku provoi me një goditje dënimi, e cila u prit aspak mirë nga Lika dhe më pas shkoi te Fukui, i cili e kishte të thjeshtë për ta shtyrë në rrjetë.

Pas 10 javëve të para, Tirana ka grumbulluar vetëm 9 pikë, ndërkohë që një Kamza ka një më pak në vendin e parafundit. /Koha Jone/