U dënua me 8 ndeshje pa tifozë, drejtuesit e Flamurtarit bojkotojnë ndeshjen në Shkodër

Drejtuesit e Flamurtarit kanë vendosur të bojkotojnë në mënyrë simbolike ndeshjen kundër Vllaznisë, e vlefshme për kampionatin, e cila do të luhet të enjten në orën 16:30 në stadiumin “Loro Boriçi”. Vendimi vjen si reagim ndaj dënimit të fushës së Flamurtarit me 8 ndeshje pa tifozë, pas vendimit të Komisionit të Disiplinës pranë FSHF-së.

Presidenti i klubit vlonjat, Sinan Idrizi, së bashku me drejtues të tjerë, ka bërë të ditur se nuk do të udhëtojnë drejt Shkodrës për këtë takim. Në shenjë proteste, edhe tifozët e Flamurtarit nuk do të jenë të pranishëm në stadium.

“Në shenjë reagimi ndaj vendimit të Disiplinës në FSHF, asnjë zyrtar i Flamurtarit nuk do të udhëtojë drejt Shkodrës. Nuk ishte një vendim aspak i drejtë që për një incident të dënohet një qytet i tërë”, është shprehur Idrizi.

Ai theksoi se klubi nuk ka ndërmend të bojkotojë kampionatin, por protesta do të jetë e kufizuar vetëm në nivel drejtuesish dhe aktivitetesh zyrtare të FSHF-së.

“Flamurtari nuk do të bojkotojë kampionatin, por ne si zyrtarë do të bojkotojmë çdo aktivitet të FSHF-së. I vetmi që do të udhëtojë me skuadrën është sekretari i klubit, Alfred Ferko”, përfundoi presidenti i Flamurtarit.

Vendimi ka shtuar tensionet mes klubit vlonjat dhe institucioneve drejtuese të futbollit shqiptar, ndërsa pritet të shihet nëse do të ketë reagime të mëtejshme në ditët në vijim.