United bën gati planin e merkatos, synohet dyshja Tonali-Ederson në mesfushë

Me rikthimin në Champions League si objektiv kryesor, Manchester United duket i vendosur të ndërtojë një skuadër më konkurruese për sezonin e ardhshëm. Drejtuesit e “Djajve të Kuq” po planifikojnë një revolucion në mesfushë dhe kanë identifikuar dy emra të mëdhenj si prioritet në merkato: Sandro Tonali dhe Ederson.

Sipas raportimeve, klubi anglez synon të ndërtojë një repart qendror më fizik dhe cilësor, ndërsa ka nisur kontakte konkrete për të afruar të dy mesfushorët në Old Trafford. Operacioni financiar pritet të jetë shumë i kushtueshëm dhe mund të mbështetet pjesërisht nga shitjet e lojtarëve, si dhe nga të ardhurat që mund të sigurohen nga transferimi përfundimtar i Rasmus Højlund te Napoli.

Në rastin e Edersonit, largimi nga Atalanta duket gjithnjë e më i mundshëm. Mesfushori brazilian pritet të mbyllë aventurën e tij në Bergamo pas sfidës ndaj Fiorentinës, ndërsa mungesa e një marrëveshjeje për rinovimin e kontratës, që skadon në vitin 2027, e bën verën aktuale momentin ideal për klubin italian që të përfitojë maksimalisht ekonomikisht nga shitja e tij.

Atalanta raportohet se ka vendosur një çmim prej rreth 50 milionë eurosh për kartonin e lojtarit dhe nuk konsideron të mjaftueshme ofertat fillestare prej rreth 40 milionë eurosh të ardhura nga Anglia. Në garë për brazilianin ka qenë edhe Atlético Madrid, i cili thuhet se kishte arritur një marrëveshje paraprake për pagën e lojtarit, por hyrja e fuqishme e Manchester United ka ndryshuar situatën. Klubi anglez raportohet se i ka ofruar mesfushorit një kontratë prej rreth 4.5 milionë euro neto në sezon.

Ndërkohë, pista që çon te Sandro Tonali paraqitet më e ndërlikuar. Ish-mesfushori i Milani, i transferuar te Newcastle United në vitin 2023 për rreth 60 milionë euro, është kthyer në një nga figurat kryesore të skuadrës angleze. Për këtë arsye, drejtuesit e Newcastle nuk kanë ndërmend të bëjnë lëshime dhe thuhet se kërkojnë të paktën 100 milionë euro për të lejuar largimin e tij.