Vëllai dëmton vëllain

Njëri vesh fanellën kuqezi, ndërsa tjetri atë të Zvicrës. Të dy janë lindur në Bazel por kanë pozicione të ndryshme në fushë. Këtë herë ëllezërit Ajeti e panë veten përballë njëri-tjetrit, për të demonstruar atë që dinë të bëjnë më mirë, të luajnë futboll.

Arlind dhe Albian Ajeti ishin në fushë në ndeshjen Gras’hopers-Basel por fati rezervoi një të papritur të hidhur për futbollistin e kombëtares kuqezi. Arlind Ajeti nuk do të mund të luajë futboll për pjesën e mbetur të vitit 2018, pasi u dëmtua nga vëllai i tij, Albiani. Pas një përplasjeje midis tyre, mbrojtësi i Shqipërisë pati dhimbje dhe shtrëngoi shpatullën duke kërkuar ndihmën mjekësore.

Ai u rifut në lojë por e pati të vështirë që të luante në përfundim të pjesës së parë. ”Kjo është një situatë mjaft e sikletshme dhe më vjen shumë keq për vëllanë tim. Nuk është aspak e bukur që të nxjerrësh shpatullën. Unë uroj që të kthehet sa më shpejt. Nëse është e shkruar, ne do të takohemi përsëri 20 herë, dy herë apo asnjëherë. Kur të ndodhë, më mirë të evitojmë pak më shumë njëri-tjetrin”, tha Albiani.

Mjekët rekomanduan ndërhyrje kirurgjikale për Arlind Ajetin dhe nëse kjo ndodh, mbrojtësit kuqezi do t’i duhen dy muaj rikuperim dhe praktikisht do të kthehet në fushë vitin tjetër.