Forcat e RENEA-s dhe FNSH-së kanë zbarkuar në Rrëshen, pasi sot bëhet një vit nga vrasja e Kastriot Reçit. Frika e një incidenti të mundshëm në ceremoninë e përkujtimit, ka bërë që forcat e policisë të hartojnë një plan masash.
47-vjeçari u ekzekutua në një plan të mirëorganizuar me një plumb të vetëm në zemër me snajper, nga një person ende i paidentifikuar nga policia, por që dyshohet të jetë vrasës me pagesë. Reçi sapo doli nga makina ”Mercedes Benz”, të cilën e parkoi pas Pallatit të Kulturës ku është dhe lokali i tij, takoi një grua e cila mbante përdore një fëmijë në shëtitoren e qytetit, dhe në ato momente qëllohet me snajper dhe bie menjëherë në tokë.
Kastriot Reçi u qëllua rreth orës 11:00 dhe ishte nisur si çdo ditë për të shkuar në lokalin e tij në qendër të qytetit të Rrëshenit, ku u qëllua për vdekje. Autori, emrin e të cilit policia nuk e ka ende, ishte veshur si grua, me fustan dhe paruke, dhe kishte hipur në katin e shtatë të një pallati rreth 150 metra larg, në apartamentin e mikut të Tonin Gjinit, njohur edhe me emrin Armando, gjithashtu i vrarë vite më parë në Rrëshen, njohur si pjesë e grupit të Met Kananit dhe i arrestuar për drogë në 12 Maj të 2018.
Mënyra e ekzekutimit dhe zgjedhja pikërisht e këtij apartamenti i çon hetuesit drejt pistës së hakmarrjes, pasi Reçi, edhe pse zyrtarisht asnjëherë e faktuar me prova, dyshohej të fshihej pas vrasjes së Tonin Gjinit në 12 gusht 2019.