Përplasjet mes protestuesve dhe forcave të policisë para Kryeminsitrisë dhe Bulevardin ”Dëshmorët e Kombit” janë përshkallëzuar. Sapo studentët dhe protestuesit kanë mbërritur, Policia e Shtetit ka qëlluar me gaz lotsjellës për t’i larguar nga kryesia e kuvendit dhe kryeministria, por protestuesit i janë përgjigjur me gurë. Pavarësisht ujit dhe gazit lotsjellës po bëhet i pamundur largimi i protestuesve.
Ajo që ka rënë në sy gjatë këtyre minutave është prania e efektivëve të policisë në tarracën e godinës së Kryeministrisë. Ata janë kapur nga kamerat dhe aparatet fotografike teksa hedhin bombola gazi lotsjellës direkt nga lartësia mbi protestuesit që ndodhen në shesh. 3 protestues janë paraqitur në Shërbimin e Urgjencës në Spitalin Universitar të Traumës (SUT), ku po marrin trajtim mjekësor pas lëndimeve të pësuara.
Sipas informacioneve të deritanishme, të tre personat ndodhen në gjendje të mirë shëndetësore dhe janë koshientë. Njëri prej protestuesve ka deklaruar se është lënduar gjatë ditës së djeshme, por është paraqitur në spital vetëm sot për të marrë ndihmën e nevojshme mjekësore. Dy protestuesit e tjerë po marrin trajtim në urgjencë. Deri në këto momente nuk janë bërë të ditura detaje të tjera mbi rrethanat në të cilat kanë ndodhur lëndimet apo mbi natyrën dhe shkallën e tyre.
KRONIKA
Pas 4 orëve te Ministria e Arsimit ku herë pas here ka pasur përplasje me policinë, protestuesit kanë nisur të marshojnë. Ata janë në bulevardin “Dëshmorët e Kombit” dhe po i drejtohen kryeministrisë. Në tarracën e Ministrisë së Brendshme gjenden policë që hedhin gaz lotsjellës, kundrejt të cilëve protestuesit lëshojnë brohorima e reagime të revoltuara.
Tensione dhe përplasje verbale janë shënuar edhe në këtë ditë të pestë të protestës studentore para Ministrisë së Arsimit, ku protestuesit u janë drejtuar me tone të ashpra efektivëve të policisë, duke i akuzuar për përdorim force ndaj të rinjve që protestojnë, si dhe për hedhjen e gazit. Një i ri ka treguar një plagë në trup, duke thënë se protestuesit po goditen me plumba gome nga ana e Policisë së Shtetit. “Po na gjuajnë me plumba gome”, është shprehur i riu, teksa ka treguar plagën e marrë gjatë tubimit dhe kjo po ndodh për herë të parë në këto ditë të trazirave që po ndodhin në Tiranë. Sakaq një studente është plagosur.
Një pjesë e protestuesve është izoluar dhe po mbahet e bllokuar nga kordonët e policisë brenda rrugicave të lagjeve ngjitur, duke mos u lejuar të dalin në aksin kryesor të Rrugës së Durrësit. Pjesa tjetër e protestuesve që ndodhet në rrugën kryesore po përballet me një ndërhyrje masive të forcave të rendit. Për të shpërndarë turmën, policia po përdor ujë me presion dhe sasi të mëdha gazi lotsjellës, ndërsa raportohet se ndaj protestuesve janë qëlluar edhe plumba gome.
Një prej protestuesve iu drejtua policëve me thirrje të forta, duke i pyetur se përse po vepronin në këtë mënyrë ndaj të rinjve. “Po janë fëmijët tuaj ore! A s’ju vjen keq? Për Edi Ramën i bëni këto gjëra?”, dëgjohet të thotë ai, duke kundërshtuar ndërhyrjen e forcave të rendit. Edhe një qytetare shprehu indinjatën ndaj efektivëve, duke i kujtuar se paguhen nga taksat e qytetarëve dhe duke i akuzuar se po dëmtojnë të rinjtë me përdorimin e gazit. Ajo përmendi gjithashtu të riun e plagosur gjatë protestës së një nate më parë, duke kritikuar ashpër veprimet e policisë.
Momentalisht ka përplasje të dhunshme mes policisë dhe protestuesve. Ka gaz lotsjellës, gurë dhe plumba gome.
Mësohet se gjendja shëndetësore e 21-vjeçarit Muhamet Skana, i cili u përplas me një efektiv policie gjatë protestës, është përmirësuar, por problemet vijojnë. I riu ende nuk arrin të kujtojë apo të tregojë se çfarë ka ndodhur që nga momenti i incidentit, shoqërimi në komisariat dhe deri në mbërritjen në Spitalin e Traumës. Familjarët kanë bërë të ditur se e kanë të vështirë të flasin për mediat, por kanë theksuar se do ta ndjekin çështjen deri në fund. Edhe polici i rendit në Shkodër, Fazlli Rama, është drejt përmirësimit, në gjendje stabël.
Ndërkohë sot Kryeministri Rama ka prezantuar dritaren ”Dëmi im” në E-Albania, që do të shërbejë për dëmshpërblimin e bizneseve të vogla që u dëmtuan nga protestuesit gjatë 4 ditëve të fundit. Në një dalje në llogarinë e tij në Facebook, kryeministri shpjegoi se si do të funksionojë platforma si dhe shtoi se në terren do të jenë 10 grupe nga Tatimet për verifikimin e dëmeve teksa shprehu se ‘do t’i kthejmë këto gërmadha në shëmbëlltyra të forcës sonë për të ecur përpara’.
Lexoni edhe:
Ish-ministri Lleshaj: Protestuesit të ruhen nga të infiltruarit, besoj që ka shërbime të huaja
Ish-ministri Lleshaj: Protestuesit të ruhen nga të infiltruarit, besoj që ka shërbime të huaja
FOTO/ Trazira te Ministria e Arsimit, i riu tregon plagën: Po na gjuajnë me pl*mba gome
FOTO/ Trazira te Ministria e Arsimit, i riu tregon plagën: Po na gjuajnë me pl*mba gome
Çfarë po ndodh në Rinas? Aeroporti Ndërkombëtar i Tiranës del me deklaratë zyrtare
Çfarë po ndodh në Rinas? Aeroporti Ndërkombëtar i Tiranës del me deklaratë zyrtare
Berisha: Biznesi të përdorë fuqinë ekonomike kundër qeverisë, Rama të dorëhiqet ose s’do gjejë vrimë miu ku të futet
Protesta nis me tensione: “Duam revolucion, nuk e duam më Edi Ramën kryeministër”
Protesta nis me tensione: “Duam revolucion, nuk e duam më Edi Ramën kryeministër”
Në Korçë ka nisur protesta, qytetarëve u bashkohet edhe një mësues gjimnazi
Në Korçë ka nisur protesta, qytetarëve u bashkohet edhe një mësues gjimnazi